政壇：濫用立會資源工黨斷正

其實喺佔領行動期間，有泛民議員已經以「接見訪客」為由，長期借用立會大樓會議室，供一班示威人士入內瞓覺或休息，沒料佔領行動後仍未收斂，繼續濫用立會資源。立會行政管理委員會今日開會討論此事，話說上月起，有泛民議員助理帶領一名留守者，仲用超級市場手推車載住十幾個保溫熱水壺，上到大樓九樓泛民樓層茶水間斟熱水，再施施然運送離開。

進出口界議員「象哥」黃定光及後就目睹幾次類似情況，然後向秘書處投訴。秘書處翻查閉路電視錄影帶，發現其中一次係工黨社福界議員張國柱助理帶領一名留守者上樓，而其黨友何秀蘭嘅助理則帶該名留守者落樓。

秘書處及後決定發信警告兩名議員，指兩人犯下「三宗罪」，包括在未有議員陪同下容讓訪客隨便喺大樓活動、擅用立會資源作非立法會用途、明知超市手推車是贓物，但都容許進入立會。秘書處事後亦在茶水間張貼告示，提醒飲用水只作立法會用途。

收警告信仍死撐

張國柱回應時仍「死撐」，指「幫吓人有乜問題，又唔係入嚟搞搞震」，認為唔應該吝嗇少少物資，聲言不排除將來會再帶人進入立會，但佢承認秘書處「有佢嘅道理」。何秀蘭就承認有收過警告信，但暫時不回應件事。