近排香港拗得最面紅耳熱嘅，肯定係袋唔袋住先。不過計太一叮話齋，選舉制度未完善，就話可以「袋住先」啫，但係如果遊樂場設施蓉蓉爛爛，殘破不堪，小朋友唔知危險仲「玩住先」，後果分分鐘可大可小o架！

係咁嘅，有觀塘順天邨居民向本報投訴，邨內兩座兒童遊樂設施由舊年九月起，先後因損壞被圍封，話就話今年第一季可以整番好，點知上個月尾又話未搞掂，小朋友好似蜑家雞見水咁，有得睇冇得用。最離譜嘅係，經常有家長無視警告封條，帶埋仔女突破「防線」使用破損設施，房署辦事處雖然只係十零步之遙，居然冇職員出嚟勸阻。你話嘞，一個唔好彩有小朋友損手爛腳，隻鑊邊個孭先？

聽吓房署點解畫先。佢哋話喎，其中一個涉事設施嘅維修工程，因為訂購物料需時，估計工程要到七月中至完成；至於另一個設施，舊年年檢時發現安全未達標，但原先個承辦商已經被剔出合約名單，重新招標下，今個月先展開工程，預計一個月內完工喎。

嗱，呢啲咪係死雞撐飯蓋囉。家陣又唔係起穿梭機，更加唔係訂購太空金屬，使唔使拖咁耐呀？至於承辦商被剔出名單，房署一直闊佬懶理，拖得就拖，到出事至急急補鑊，更加係荒天下之大謬。有地區人士就講得啱嘞，事件反映房署外判政策欠缺統籌，特別係交接制度有好大漏洞，咁搞法唔出事至奇喇！

當然喇，港產官僚出名做嘢懶散，不負責任，呢單畸士其實只係小兒科啫。家陣全港有三十幾個大大小小臨時康樂場地，部分啟用至今近四十年仲未「轉正」，由於呢類公園話到尾都係臨時性質，當局唔肯落本維修，以致設施簡陋，有等於冇，唔止浪費公帑，更加浪費土地資源。

話時話，地區建設甩漏多多，真係數到天光都數唔完。呢，港府三年前提出向十八區區議會分別發放一億元，推動地區工程，點知因為爭拗太多兼夾手續繁複，到依家真正落實嘅寥寥無幾。不過冇所謂啦，反正社會泛政治化，立法會最叻拉布，乜嘢基建工程都阻住晒，官僚無所事事，咪仲樂得逍遙快活。

始終都係嗰句︰港府大事做唔到，小事做唔好，連維修遊樂場咁簡單嘅事都搞出個大頭佛，香港又有乜法子唔烏煙瘴氣，不斷沉淪吖，叮！

第一手消息請下載on.cc東網iPhone/iPad/Android/Windows Phone Apps