早前尼泊爾發生大地震，喺當地興建咗學校嘅名模夫婦Jocelyn同Anthony，當然非常擔心當地六十名學生嘅情況。Jocelyn話：「間學校完全破壞晒，已經倒塌，好彩冇學生死，但有受傷，不過佢哋已經接受緊治療，會好快康復。暫時唔會重建學校住，重建學校要一萬五千美元（近十二萬港元），依家有當地人連屋企都被摧毀，有啲甚至要瞓喺街，用呢啲錢嚟救災、買物資仲實際。我哋打算將學校同當地其他學校合併，咁樣學生就可以完成學業。」

Jocelyn同Anthony喺尼泊爾興建嘅學校已倒塌，受咗傷嘅學生現正接受治療。

怕搶資源唔去災區

Anthony話尼泊爾人依家最需要大家嘅支持。問到二人有冇打算到當地協助救援工作？Anthony話：「唔會住，人哋建議我哋唔好過去。因為我哋去嘅話，會用咗當地災民所需嘅物資，好似食物同水咁。」而為咗籌集更多嘅款項，佢哋將喺本月二十九日舉行慈善義賣籌款，Jocelyn話：「我哋聯絡晒我哋所有識嘅品牌同客戶，請佢哋捐啲產品畀我哋義賣，我哋會將籌到嘅善款捐去尼泊爾」。

佢哋話早喺大地震發生當日已打算辦籌款活動，但由於佢哋要到外地工作兩星期，故一直未能實行。佢哋喺數日前回港，便即時動手籌備，Jocelyn話：「我哋依家一日做十六個鐘，不過一切都進行得好順利，希望籌到多啲錢幫人。」

第一手消息請下載on.cc東網iPhone/iPad/Android/Windows Phone Apps