城中鏡：星級膳舉 籌款助自閉童
為發展障礙兒童提供支援嘅協康會，早前舉行「全港廚師精英大匯演」籌款活動，唔少城中名人買慈善餐券請朋友去擦餐飽，包括連續多年贊助活動嘅太子珠寶鐘錶副主席兼執董Emily鄧宣宏雁。Emily話好多人對自閉症嘅了解有限，所以社會施援及早發現治療，情況就可以有好大改善。
鄧鉅明夫婦（左一及二）同林建康夫婦（右一及二）做善事好合拍。
歐陽卓倫（右）呼籲社會關注自閉弱能人士。左為協康會總幹事曾蘭斯。
蘇慶和（右）同楊家聲一身便裝打扮去歎星級佳餚。
今次籌款活動，共有五十多位城中星級名廚齊聚炮製佳餚，出席嘅名人包括房協主席楊家聲、市建局主席蘇慶和、愛沙尼亞共和國駐港名譽領事林建康夫婦等。協康會主席歐陽卓倫就話，目前政府只提供約六千個資助名額，但仍有六、七千人輪候，自閉患者包括有言語及社交障礙，好多時不被察覺，若延誤治療，情況將進一步惡化，實在令人擔憂。
鄧鉅明自嘲炒股明燈
Emily嘅老公太子珠寶鐘錶主席Jimmy鄧鉅明亦有到場，講到近期股市熱潮，佢自爆炒股往績係一段「好悲哀」嘅故事。話說Jimmy曾經期貨、股票乜都炒，但乜都輸，後來決定轉做長期投資者，喺恒生指數七千二百點時以一百二十五元買入滙豐，點知依家指數升到兩萬七千五百幾點，但滙豐股價只得七十五元，真係陰功。難怪Jimmy笑自己嘅「明燈」效應仲勁過丁蟹喎！不過，後來佢轉為炒樓，投資收益仲勁過股票啦！
