政壇：李文恩獨當一面 畀媽咪讚到面紅
理文化工同理文造紙尋日AGM（周年股東大會），理文化工主席衛少琦同舊年八月先兼任CEO嘅三仔Norman李文恩一齊出嚟。
媽咪衛少琦（右）公開讚李文恩做得好。
「建廠、買地、批文，佢（Norman）都一手一腳搞晒……等二○一六年開始你哋睇到公司業績，就會知道佢做得有幾好！」就係媽咪衛少琦呢幾句公開讚賞，Norman即話「多謝讚賞」，仲面都紅晒添！
其實李氏一門四傑，大仔李文俊同孻仔李文斌，喺理文造紙分別擔任主席同CEO；加埋喺理文手袋擔任執董嘅二女李文禎，四傑個個都獨當一面，阿爸阿媽安心晒。
