政壇：細價樓牙骨交戰兩博士紛出招

話說湯博士二月時預言「細價樓三個月內爆煲」，林博士唱反調。湯博士隨後話訂咗位八月十四日喺「富豪飯堂」擺場飯局，邀請林博士出席，仲話如果當日樓價指數升穿136.64點就當自己輸。剛啱嗰日，林博士講明唔會出席，仲希望湯博士不如將飯局錢捐畀慈善機構，佢自己亦會捐出相同金額。

去到尋日，湯博士就話會預留一席畀林博士，但唔係免費，希望林贊助一百二十本林嘅新書喎。嗱，亮點跟住嚟，湯博士話同時亦會送佢自己兩本新書畀來賓。至於捐款，湯博士話隨緣，跟手又補句話佢公司紀惠每年都捐超過一千萬，但從不張揚喎。

尋日林博士話堅決唔出席，佢話「我去咗仲麻煩，報紙會寫得更加多，沒完沒了，想快啲完結咗佢。」咁捐書呢？佢話人都唔去，唔會做呢個動作啦！

呢兩位博士，一個喺Blog寫，一個喺facebook講，喺全世界面前隔空招來招往，好難當睇唔到噃。