政壇：律師會連任會長熊運信或破慣例
之前都講過，律師會喺上星期四改選，現任會長Stephen熊運信連同兩名副會長Thomas蘇紹聰及彭韻僖成功連任，尋日同傳媒見面。律師會有不成文規定，會長最多做兩屆，即兩年就要交棒，但尷尬嘅係，Stephen舊年八月就上任替補前會長林新強，咁過去半年算唔算一屆呢？莫非要好似特首任期爭議咁要搵「人大釋法」？接任人選之一嘅Thomas就好巧妙話，會長係由理事選出，理事支持就可以繼續做喎。咁Stephen咪可以做足兩年半會長？
熊運信（中）與蘇紹聰（左）及彭韻僖（右）尋日出嚟見大家。
律師會喺政改第二階段諮詢期間相對低調，只係透過新聞稿表達立場，係咪因為前會長林新強講錯嘢而下台，「一朝被蛇咬、十年怕草繩」？Stephen強調律師會係政治中立，一般都係以書面發布意見，好少開記招，低調處理。至於支唔支持「袋住先」就唔係律師會可以同需要回答嘅問題，皆因十個律師隨時有十二個法律意見，更何況呢啲係政治問題。佢又話佢哋計劃明年初訪京，拜會司法部、法院等部門。
