政壇：AV仁扮黨鞭施壓黃成智
白鴿黨嘅溫和派老鴿黃成智、狄志遠同羅致光近日先後發聲，呼籲泛民主派對政改「袋住先」，令黨內激進乳鴿不滿。黃成智日前仲發起一人一信聯署行動，利用民意逼泛民考慮「袋住先」，搞到「AV仁」何俊仁尋日聯同激進乳鴿許智峯召開記者會，齊聲譴責黃成智，AV仁仲扮「黨鞭」警告若不取消聯署行動，就凍結黃成智嘅黨籍。
笑溫和老鴿「投降派」
AV仁喺記招一開始就話同許智峯唔代表中委，而係以黨員身份回應黃成智嘅聯署行動。佢話作為資深黨員，對黨嘅紀律好熟悉，話該黨元老「華叔」司徒華在生時，就好似條黨鞭咁，各黨員都嚴守紀律同團結，但華叔過身後，個黨就冇咗條黨鞭，令個黨冇晒紀律，佢覺得中委仍要關心紀律問題，否則就冇人會再尊重個黨。佢又指黃成智有權利去爭取黨員支持「袋住先」立場，但對外收集簽名，就係同個黨以至泛民嘅意向相違背及對着幹。
AV仁又話，開記招前曾透過資深黨員致電黃成智，勸對方取消聯署行動，如果繼續行動，佢就會考慮要求黨召開緊急中委會議，凍結黃成智嘅黨籍。至於許智峯就貫徹激進風格，呼籲溫和黨員慎重考慮退黨，留喺度只會加劇個黨瓦解，仲笑佢哋係未打先放棄嘅「投降派」。AV仁喺呢個時候再次劃清界線，話叫人退黨係許智峯嘅講法，佢只係針對黃成智嘅紀律問題，尋日講嘅嘢都係用個人身份表達，真係又要威又要戴頭盔。
雖然AV仁無端端黨鞭上身，教訓黨員應該遵守紀律，但佢就話邊個繼任黨鞭都係後話，主席同副主席都應該留意紀律。對於AV仁嘅批評，黃成智就話聯署行動唔會停，佢只係以市民身份收集簽名，唔諗紀律處分呢樣嘢住。咁又係，AV仁咁樣開記招都話唔代表中委，依家黃成智以個人身份收集簽名唔得咩？
