通街無殼蝸牛 貪曾罪魁禍首
東晉權臣桓溫有句名言︰「大丈夫生不流芳百世,亦當遺臭萬年。」如果按照呢個標準,前特首貪曾爵士都可算名副其實嘅「大丈夫」咯!
貪曾「貪遍省港澳,歎盡海陸空」嘅臭史早就街知巷聞,市民等佢落鑊等到頸都長。之不過咁,貪曾在位七年禍港殃民,除咗貪腐,房屋政策失誤,搞到通街無殼蝸牛,一樣唔可以輕輕放過。呢,喺尋日一個論壇節目上,有房委會委員就大翻貪曾舊帳,特別係公屋興建緩慢,搞到輪候冊條龍愈來愈長。雖然家陣嘅廿八萬申請者當中,有唔少係年輕人,將來會唔會上樓仲係未知之數,但港府同房委會唔可以因為咁就闊佬懶理,應該諗多啲計覓地建屋咁話。
今時今日上樓有幾難?港府話就話承諾三年上樓,但事實係輪候時間愈來愈長,最新平均數已經去到三點三年。有非長者單身人士等十年都未有着落,忍無可忍之下,申請司法覆核,要求推翻公屋計分制添。其實計太一叮話齋,冤有頭,債有主,要找晦氣嘅話,應該搵罪魁禍首貪曾至啱數吖嘛。再唔係,搵嗰位一直霸住公屋嘅尊貴議員,讓番個單位出嚟都得。
當然喇,貪曾靠害市民,又點止興建公屋放軟手腳咁簡單吖。佢當年決定停建停賣居屋,又唔做土地儲備,美其名穩定樓市,實際上係將市場拱手讓畀既得利益集團。今時今日樓市屢創癲價,已經完全脫離市民負擔能力。尋日之嘛,就有老牌屋苑千多呎複式單位,以破紀錄嘅二千六百八十萬元成交,平均呎價逼近二萬三千元,問你怕未。愈來愈多市民買唔起私樓,捱唔起貴租,又輪唔到公屋,最終淪落到要住劏房,呢啲講到尾咪係貪曾當年好帶挈囉。
最離譜嘅係,樓市長升長有,民意強烈要求恢復賣地,貪曾竟然一口拒絕,做法全世界罕見,簡直令人嘆為觀止,話唔係谷高樓價明益大商家喎,三歲細路都唔信喇。再睇吓佢同邊啲富商巨賈行得最埋,當中有乜蠱惑,相信畫公仔唔使畫出腸喇啩。
話時話,貪曾同富豪勾肩搭背,咁多年嚟都唔知刮刮埋埋幾多油水,唔怪得有人形容佢係「港版和珅」。不過咪睇和珅權傾朝野,富可敵國,新皇帝一上場咪又係手起刀落殺無赦。係嘞,貪曾到依家仲係逍遙法外,到底因乜解究呢?唔通仲有人包庇佢?叮!