城中鏡：葉家寶趕稿惹跳船疑雲

依家亞洲電視人手嚴重流失，早前就宣布今日起取消午間新聞，如果之後唔可以按法例規定每日提供兩節十五分鐘嘅詳盡新聞報道，仲會好大機會提早收檔。就喺呢個危到不能再危嘅時刻，尋日我哋就見到亞視執行董事葉家寶喺中環一間服裝店外埋首寫嘢，莫非係填緊申請表見新工？葉家寶就笑笑口話，只係有兩篇稿趕住要交啫，惟有喺街度搵個位快快手手起貨囉！至於亞視結業之後有乜嘢去向，佢都話未有打算，目前都係搞好亞視，同準時出糧最緊要喎！