城中鏡：名人姪女 水墨階梯 清秀脫俗
喺樓梯上面嘅水墨畫你見過未？由藝育菁英基金會主辦嘅「水墨階梯」計劃，「響頭炮」係國學大師饒宗頤（饒老）作品《香遍三千大千世界》，依家去美孚饒宗頤文化館就有得睇。基金會期望兩年之內，喺各區至少打造十五條「水墨階梯」，即係話將來行街都有機會欣賞到水墨畫，聽落又唔錯喎。
楊釗姪女楊燕芝（左）尋日代表旭日集團出席活動，支持水墨階梯計劃，許曉暉（右）表示感謝。
饒宗頤畫作化作水墨階梯，為鬧市增添一點寧靜雅氣。
林旭輝話先要將水墨畫切割成配合樓梯長度及梯級大細，工序極之考究。
咪以為將幅畫貼落樓梯好簡單，計劃嘅創作總監、靈美創意培育基金總幹事林旭輝話，每條「水墨階梯」製作時間大約九日，首先要將幅畫切割成配合樓梯長度同梯級大細，之後要喺畫嘅表面，塗上三層防水、防紫外光專用膠水，貼上去後仲要用毛巾慢慢喺畫上面印，避免幅畫同梯級之間留有空間易整爛。之後仲要定期復修，預計維持到八至十年。
不過，林旭輝話最難嘅步驟始終係揀選合適樓梯：「太多人上上落落唔得，因為人太密根本無人見到幅畫，但又唔可以無人經過，四四正正長長地，可以一幅過貼幅畫上去就最好。」
盼成「亞洲水墨之都」
為「水墨階梯」剪綵嘅嘉賓當中，發現有一名樣貌清秀嘅名人二代，佢就係中華總商會會長楊釗姪女楊燕芝。燕芝現為旭日創業服飾（惠州）董事，尋日代表家族出席活動，脫俗氣質令人眼前一亮，但佢見到鏡頭好怕羞，唔肯透露太多家族背景。受阿叔影響，楊燕芝都加入中總做會董，又係惠州新動力常務副主席，不難成為社團界明日之星。
「水墨階梯」計劃係民政事務局有份資助嘅「香港‧美善之都」其中一個項目，民政事務局副局長許曉暉話將文化帶入社區，係希望市民日常生活中更加容易接觸到藝術，仲話中國水墨畫正喺亞洲急速發展，想藉計劃將香港發展為「亞洲水墨之都」喎。
