政壇：搞搞政：泛民專業團體「人盯人」箍票
雖然泛民主派立法會議員多次聯署表明堅決反對政改方案，但十一個關注政改嘅泛民專業人士團體亦積極向所屬嘅功能界別嘅議員箍票，實行採取「人盯人」策略，若有關議員最後真係「轉軚」支持政改方案，有團體唔排除下屆選舉派人狙擊。
（設計圖片及對白）
佔領行動之後，一群熱衷政制發展嘅後起之秀火速冒起，當中唔少係律師、醫生、精算師同建築師，打住專業人士旗號反對政改方案，尋日十一個關注政改嘅專業人士團體仲喺銅鑼灣擺街站收集市民簽名。近日民主黨多名老鴿紛紛現身要求黨友通過政改方案，令呢批團體擔心政改方案有機會通過，所以就要求同代表佢哋嘅議員對話，唔單止要箍緊泛民二十七票，仲希望畀建制派知道佢哋反對政改嘅決心。
業界民調「輸打贏要」
其中護士政改關注組正安排同衞生服務界議員李國麟會面；至於同樣被外間視為熱門撬票對象嘅資訊科技界莫乃光同法律界郭榮鏗，團體對佢哋非常有信心，暫時都未有行動。除咗泛民議員外，醫學界「怪醫」梁家騮亦都曾經表明要否決政改方案，但醫學界組織杏林覺醒就對怪醫最後反對政改無咩信心，事關醫學會正搞緊第三次業界政改民調，明顯係有人唔滿意上兩次民調結果，所以「輸打贏要」要推倒重來。
此外，由於近七成精算師都喺保險公司工作，代表精算師嘅精算思政就準備約見保險界議員陳健波。雖然佢哋對成功游說陳健波否決政改完全無信心，但都叫做反映過業界意見喎。隨住政改進入倒數一個月，泛民內部箍票力度只會愈來愈大，如果相關功能界別議員最後真係「轉軚」支持政改，相信呢批專業團體明年必定派人參選立法會狙擊有關議員，就算無把握都要玉石俱焚。
