政壇：一統上海幫 舵手考功力

近年香港一直由福建、廣東、廣西三大社團雄霸，反觀人力物力都充足嘅上海幫反而無乜「成績」。據聞有關方面都感到香港上海幫有一盤散沙迹象，所以催生出「江蘇社團總會」，希望藉此提升愛國愛港陣營嘅力量，同平衡各大社團勢力。

成立典禮 來賓矚目

最近各大社團都忙於發起撐政改簽名活動，偏偏喺眾多社團之中，就好少見上海幫出現。不過，形勢隨時有機會逆轉，因為涵蓋幾十個屬會嘅江蘇社團總會（總會），本周三將會舉行成立典禮。

聽講總會已獲北京「祝福」，而全國政協常委「唐唐」唐英年將擔任召集人，做總舵手一統香港上海幫，用盡政界人脈關係網，所以大家要留意典禮當日，到底會有咩人捧場，隨時睇到啲端倪。

有政圈中人話，唐唐要完成呢個任務都唔簡單，事關上海幫喺香港有好耐歷史，要將一班平時好錫身嘅富商拉埋一齊已經好難，再要佢哋好似其他社團咁仆心仆命撐政改，真係幾考功力。