政壇：媽咪級名人分享育兒經
小朋友嘅教育好重要，好似名媛何苗春暉同多名媽咪級嘅名人尋日都好支持一個教育團體嘅獎學金頒發典禮。前港姐Heidi朱凱婷同老公帶埋囡囡Sheryl嚟，Heidi話已第三次同Sheryl現身公開活動，又話：「佢第一次同我出嚟係差唔多一歲，佢都有係呢度上堂，有啲由一歲學到依家，學芭蕾舞同英文。」
黃婉君（左）同何苗春暉都好關注小童教育。
朱凱婷同老公、囡囡出席典禮。
Heidi話慶幸自己嘅工作時間好彈性，可以好好分配同平衡時間，除咗工作外，都可以做一個全職媽咪，同埋做佢嘅老師加好朋友。佢又話好珍惜同囡囡依家相處嘅時光：「小朋友頭三至五年好重要，你投入多啲時間同佢相處，兩個人嘅關係真係會close（緊密）好多，到佢入咗小學，有咗自己嘅朋友，你想黐吓佢都難。」最後佢仲強調絕不讓自己當上怪獸家長：「我會盡量取平衡，佢嘅開心先係最重要，學習都要做到好似遊戲咁，我會提醒自己唔好變成咁。」
同場見到育有兩子嘅前組合2R成員Rosanne黃婉君，佢話老公同兩個仔都有嚟，但因活動場地較多人，所以佢哋到處逛逛，冇公開現身。
