政壇：周一鑊遠遊攞嚟衰
有好多政府高官一到咗假期就掛住外遊，飛去外地玩番十日八日先返港，若期間香港有乜嘢大事發生，隨時要取消休假急急返港處理。食物及衞生局局長高永文尋日出席網台節目時，就寸爆上一任局長「周一鑊」周一嶽曾經遠遊歐洲，但點知香港有突發事件，結果被急召回港處理。高永文話經呢次事件後，佢逢親放假都只敢放四至五日，而且只會去亞洲地區，飛遠少少都驚喎。
（設計圖片及對白）
高永文尋日接受立法會議員蔣麗芸嘅網台節目訪問時自爆，自己唔係無放假，但每次放假都係幾日，而且旅遊地方只限於亞洲，至於歐洲等偏遠地區，就一定唔敢去喎。點解？因為佢聽聞上一任局長就試過飛去歐洲度假，但中途有要事被急召返港處理公務喎。雖然佢無點名講係邊個，但講得出上一任局長，係人都知講緊周一鑊啦！
我哋翻查過資料，周一鑊的確係好鍾意外遊，而且不時都係爆大鑊時先飛走，其中一次喺○五年，四川爆發豬型鏈球菌疫情時，佢本來就打算歐遊，好彩佢最後唔敢去，終留港專注防疫，唔知道高永文係咪講呢單呢？另一單就係一○年馬尼拉人質事件慘劇，周一鑊又係掛住外遊無蒲頭，要副局長梁卓偉頂硬上，但佢竟然死撐自己有遙控醫療支援嘅善後工作，做局長做到咁hea，唔怪得佢任內頻頻爆鑊兼畀人叫佢「廢官」嘞！
掌平機會被鬧「厚多士」
其實，周一鑊「翻閹」做平機會主席之後，醜聞一籮籮，好似搞「四合一」嘅歧視條例，就惹起外界批評佢不公，經常走去撐同志團體嘅活動，最近平機會資助機構進行研究，話本港傳媒二十年嚟所刻劃嘅兩性形象，令女性被塑造成持家有道嘅「模範人妻」，累在職女性倍感壓力；又話傳媒使用「o靚模」、「港女」等稱呼亦影響女性自我形象，有平機會主管仲批評負責監察傳媒嘅電影、報刊及物品管理辦事處角色被動，更聲稱稍後可能同該處合作推動傳媒自我監管，或喺業界守則加入避免性別定型等條文，即刻畀多名立法會議員鬧爆平機會「厚多士」。周一鑊做埋咁多無謂嘢，簡直係自己攞嚟衰。
