政客阻撓官無能 蓮塘口岸多波折

好似蓮塘/香園圍口岸咁吖，涵蓋旅檢大樓、貨物清關設施等多項主要工程嘅撥款申請，今年一月及四月先後被立法會工務小組委員會否決。由於標書有效期將會喺七月及八月陸續屆滿，如果未能趕及暑假前獲批撥款，勢將無法如期動工，估計工程每延遲一個月，公帑就會損失七千萬元。無可奈何之下，港府惟有變陣，決定繞過工務小組，直接向財委會闖關，下星期將會加開會議商討喎。

正所謂，道高一尺，魔高一丈。港府識得變陣，反對派更識得玩嘢，有政客已經揚言發動拉布戰，唔拖垮撥款絕不罷休。即係咁，萬一工程被迫重新招標，成本進一步飆升不特止，承建商眼見立法會拉布不絕，亦未必願意落標，工程隨時爛尾。

係人都知，隨着中港兩地交往日益頻繁，邊境口岸每日處理嘅人流車量有增無減，預計蓮塘口岸落成後每日處理三萬人次旅客，可以大大紓緩其他口岸壓力，更可以產生五百億元嘅經濟效益。真係諗極唔明，對於呢項利民措施，反對派點解要阻頭阻勢呢？

當然喇，一個巴掌拍唔響。蓮塘口岸工程一拖再拖，除咗因為政客拖後腿，更加因為港府無能。當局早前歸咎地質問題增加施工難度，令工程出現延誤，查實工程提出至今近十年，如果當初做好規劃，就唔會拖到依家至發現問題喇。港產官僚做嘢甩漏，搞到工程造價節節上升，由○七年嘅八十億元增加至現時超過三百五十億元，升幅超過三倍，又難怪政客阻頭阻勢嘅。

見微知著，基建工程無一不延誤，無一不超支，蓮塘口岸只係冰山一角咋。呢，港鐵負責興建嘅五條鐵路，全部嚴重超支，其中西港島線、沙中線同廣深港高鐵香港段更成為全球最昂貴嘅三條鐵路，尤其係高鐵，唔單止成為財政黑洞，更可能因為一地兩檢傾唔掂而淪為「低速鐵路」。港府庫房話就話水浸啫，但呢度唔見幾十億，嗰度唔見幾十億，容乜易坐食山崩！

今時今日，周邊地區聚精會神搞建設，發展一日千里，香港就一心一意窩裏鬥，搞到基建寸步難行，試問憑咩同人競爭吖，叮！