話說環境局長星星為咗寫出節能藍圖，竟於辦公室埋頭三日三夜，但苦於天資所限，爆頭仍一籌莫展。正當星星拋下眼鏡、仰天怒吼之際，眼前朦朧浮現一道人影，「乜事咁煩呀？」星星嘆道︰「計來計去慳得少少電，點交貨？」「數字嘅嘢，遊戲一場，好死嘅啫！」

星星恍然大悟，當下揮筆疾書，寫出號稱十年減四成能源強度嘅驚天大藍圖。可惜節能藍圖一面世，就被踢爆純屬吹水，能源消耗量其實慳得百分之六。

星星不堪各方圍插，龜縮辦公室借酒消愁，突然傳嚟一陣熟悉聲音，「乜事又咁煩呀？」星星定眼一望，原來神秘人影正是鬍鬚曾。「原來係你點我！」鬍鬚曾呷一口咖啡，淡然道︰「邊有點你？我成日都係咁玩數字，次次都畀人鬧爆。放心，鬧鬧吓你就慣。」星星聽罷即吐血倒地，當下即減碳排放。

第一手消息請下載on.cc東網iPhone/iPad/Android/Windows Phone Apps