立法會二○一七年行政長官產生辦法方案小組委員會舉行公聽會時，有支持政改嘅市民繼續以「娶老婆」比喻政改，揶揄揚言否決政改方案嘅泛民，如果堅持娶老婆非范冰冰、鍾嘉欣不娶，咁就要做一世毒男咁話。呢輪泛民中人嚇市民「袋一世」嘅言論又被指好毒，咁啱尋日白鴿黨議員何俊（AV仁）出席電台節目又大講要否決政改，真係搶住對號入座做一世毒男喎！

（設計圖片及對白）

「A貨林鄭」（後排中）被立會保安驅趕。

立法會尋日舉行嘅公聽會長達六小時，共聽取約一百二十位市民同團體對政改方案嘅意見。個公聽會有人玩嘢，有人認真表達對政改前景嘅擔憂，自稱任職教師嘅香港培青社主席陳志興就質疑，泛民否決政改只係為咗可以一直爭取「真普選」，又以「娶老婆」比喻普選︰「如果娶老婆非范冰冰、鍾嘉欣不娶，就成世娶唔到，做一世毒男啦！」

「A貨林鄭」涉爆粗被趕

公聽會上都有年輕人玩嘢，以「政改三人組」嘅搞笑造型登場，但佢哋自我介紹卻揶揄「政改奸人組」成員林鄭月娥，「A貨林鄭」仲涉爆粗被趕離場。出席立法會又唔正經表達意見，轉個頭又話冇機會向官員議員表達意見，究竟佢哋想點呢？

第一手消息請下載on.cc東網iPhone/iPad/Android/Windows Phone Apps