政壇：林建康睇好英地產發圍
港股近排忽然炒高，但有啲投資者更留意外國嘅投資機會，愛沙尼亞共和國駐港名譽領事林建康（Matthew），就對英國地產市道睇高一線。事關保守黨喺啱啱結束嘅國會大選中勝出，令徵收房產稅嘅陰霾一掃而空，加上早排安然度過蘇格蘭獨立公投嘅危機，所以Matthew認為，未來半年當地房價將會快步上升。
林建康認為英國地產好值得投資。右為林黃寧艷。
Matthew一向鍾情房地產投資，涉足英國地產已有逾二十年。早幾日佢同太太林黃寧艷一齊出席一個活動時話，年幾前英國地產價格曾經急升，後來大選陰霾吹近，唔少負面消息接連而出，包括工黨主張徵收房產稅，令房價升勢停晒。英國大選投票當日，佢更加好擔心，一直密切留意，結果保守黨大贏，佢成個人安樂晒。Matthew話，英國安然度過幾個風浪，不穩定因素已消失，加上全球資金始終要搵出路，投資者不妨留意吓英倫地產嘅前景。
