政壇：佳叔頻廢噏 幫政改倒米
眨吓眼，一七年嘅特首普選方案到咗關鍵時刻，早前支持方案嘅市民流失咗啲，有分析就指同建制中人失言有關，點知話口未完，現任全國港澳研究會副會長嘅劉兆佳又嚟「倒米」，一日之內連發三個惹火言論，一陣話全港五百萬選民選出嚟嘅特首人選只係參考材料，一陣又話泛民主派短期內都冇可能執政。
（設計圖片及對白）
佳叔做中央政策組首席顧問時，已不時幫政府「倒米」，尋日佢出席一個《基本法》研討會時又表演多一次，喺大學時專研民意調查嘅佢話，依家支持政改方案，同反對政改嘅民意都相當穩定同堅實，回應對方案冇意見嘅市民比例唔高，將來會出現壓倒性嘅民意結果，即支持政改嘅人壓倒性多過反對者嘅機會好微，一棍打盡眼甘甘望實民調走勢嘅人。
有議員鬧「離譜」
轉個頭，佢又講本港普選嘅功能，話根據《基本法》，本港市民普選產生嘅特首人選，仲要經中央委任，所以對中央嚟講，「特首普選結果只提供『參考材料』，沒有最終嘅『有效性』，中央任命特首的權力才是『實質』。」呢一棍又扑到唔少普選支持者暈一暈，原來一人一票選出來，都只係參考咋。
跟住佳叔嘅話題又講到泛民入閘出閘嘅可能，佢冇講提名票點樣分配，而係從泛民嘅政治哲學來分析，佢話泛民拒絕接受《基本法》同中央權威，連香港嘅憲法都唔接受，咁樣短期內都冇可能執政。佳叔嘅分析基本上都冇錯，但依家政府正傾全力爭取市民支持，仲不斷用「一人一票，特首由你選」嚟游說市民支持時，佳叔咁講，客觀效果就係「倒米」囉，有泛民議員仲即刻鬧「離譜」添，政改三人組多得佳叔唔少喇。
