一地兩檢搞唔掂 高鐵恐成大白象
笑話處處有，香港特別多。好似高鐵咁吖，延誤超支唔在講，連一地兩檢嘅安排都要望天打卦，大拿拿使咗成千億元嘅所謂高速鐵路，分分鐘仲慢過直通車，你話係咪國際大笑話吖！
係人都知，一地兩檢安排可以令旅客一次過辦理所有出入境手續，唔使左等右等，既方便又快捷，而呢個亦係高鐵嘅最大賣點之一。可惜究竟可唔可以落實，依家仲係未知之數，搞到議論紛紛，莫衷一是。有人建議先由內地立法，容許內地關員喺香港境內執法，再納入《基本法》附件三；有人就建議倣效西部通道一地兩檢，由中央直接授權特區政府處理。
港府又點睇呢？運輸及房屋局局長張炳良一味耍太極，淨係重申有關安排涉及憲制同法律等事宜，與多個部委有關，需要更多時間討論喎。咁即係點？即係叫市民慢慢等囉。
講起都好笑，高鐵工程大大話話討論咗十幾年，一地兩檢亦唔係今日至傾，依家仲係得個吉，你話唔係官僚無能都冇人信喇。
最離譜嘅係，有反對派政客上綱上線，指將一地兩檢嘅安排列入《基本法》附件三，將會葬送香港高度自治、動搖一國兩制喎。查實一地兩檢係便民措施，對大家都有好處，同政治大纜扯唔埋，政客危言聳聽，無非靠嚇啫。
講開又講，本港基建工程問題多多，又點止高鐵笑話百出吖。高鐵建造成本高昂，有「黃金鐵路」之稱，其實講到「含金量」，頂多排第三咋，同樣由港鐵負責興建嘅西港島線同沙中線，平均每公里造價分別達六十一億元同四十七億元，呢三條鐵路成為全球最貴嘅鐵路，連審計署都忍無可忍，隨時準備介入調查。
所以話，蒼蠅不叮無縫的蛋，基建工程亂象叢生，歸根究柢都係港府監管不力，授人以柄。唔怪得機場第三條跑道引起咁多爭議喇，明明勢在必行，偏偏阻力重重，主要就係因為港府未能釋除市民疑慮，特別係空域問題，一日唔解決，即使落成亦可能淪為超級大白象。雖然港府一味大派定心丸，但高鐵有辦你睇，到依家連一地兩檢都搞唔掂，你話信唔信得過吖。
見微知著，港產官僚大事固然做唔好，小事一樣搞到一鑊泡，連起條鐵路都甩甩漏漏，旨意佢哋處理政改等大事，盞嘥氣啦，叮！
