政壇：搞搞政：民協攻新選區 隨時火燒後欄
年底舉行嘅區議會選舉，其中民協老巢深水埗將增加兩席，據聞民協準備派出新人何啟明同多屆議員覃德誠去開發新區，覃本來穩坐嘅幸福選區就計劃由新人周穎恆頂上，希望增加民協喺深水埗區議會嘅議席。但呢個如意算盤恐怕無咁易打響，事關建制派已大舉喺深水埗插旗，更以「人盯人」方式狙擊民協。民協一唔小心，隨時火燒後欄，分分鐘因加得減。
建仔青年軍謀奪深水埗
民協喺深水埗有七位區議員，其中一個係立法會超級議員KK馮檢基。之前都提過工聯會將派出小花陳穎欣出征，直搗KK喺麗閣啲地盤。
最新消息係，建制派唔單止要撼贏KK，仲希望一舉奪走民協另外六席，佢哋計劃派出六個後生仔女（目及）實民協現任議員。六個新人來頭唔細，有青年建仔副主席陳威雄同青年事務委員會委員謝曉虹，睇嚟建制派今次打後生牌，志在必得。
近年民協喺區選頻頻失利，仲記得KK當年轉戰立會超級議席時，被視為接班人嘅副主席譚國僑竟連九龍西議席都保唔住，事後被指可能選舉策略失當所致。政壇八卦友話，覃德誠本來喺幸福選區做得幾好，但係民協要佢去開拓新區，其實策略上好冒險。我哋問過譚國僑，佢就否認要覃德成讓區。佢解釋話，政府將幸福選區劃咗一半做荔枝角北，而覃德成一直以來有喺當區做地區工作，所以唔算係開闢新區喎。
