政壇：護黨反拉布阿王遇狙擊
立法會預算案「拉布」戰已持續咗十一日，每逢「拉布」必鬧泛民嘅工聯會議員「阿王」王國興沉寂一輪之後，尋日終於按捺不住，狂轟「拉布」係倒錢落鹹水海，又趁機為工聯會平反，指有議員藉「拉布」抹黑工聯會，但工聯會之心可昭日月云云。人民力量「大舊」陳偉業同社民連「長毛」梁國雄就多次狙擊，令阿王發言期間五次被「剪布」，認真無癮。
阿王好勞氣話「拉布」唔止嘥時間，每日仲浪費二百六十九萬元公帑，四年來已嘥咗二十六億元。佢之前唔出聲，係因為唔想變相助長「拉布」咁話。
聽到阿王咁講，大舊同長毛先後發功，質疑佢藉發言時間宣傳工記。主席曾鈺成就叫佢集中番喺討論嘅題目上。阿王唔忿氣咁話，大舊同長毛嘅做法只會令到公眾更加關注佢所講嘅嘢，又叫大舊「睇清規程，唔好甩鬚」喎！
