政壇：大嘥鬼銷節能兼做慳神

出晒名慳水慳電嘅環境局局長「星星」黃錦星尋日宣傳全民節能運動時，連搵代言人嘅工夫都慳埋，派出幫手推廣惜食香港運動嘅大嘥鬼做兼職，名叫「慳神」，仲有個英文名Hanson。星星話因為大嘥鬼戒唔甩嘥嘢嘅陋習，所以罰佢去進修，學吓點樣節能慳電。大嘥鬼變身慳神期間，身上會多咗粒綠色嘅「鈕」，寓意要多多熄燈，手上就拎住本節能藍圖，以減少消耗能源。星星仲話以後慳神出席活動時會盡量輕鬆上陣，等個身無咁熱，唔使用咁多冷氣喎！照咁講，唔知大嘥鬼係會減肥定係換新裝呢？