政壇：張朱秋慧展畫作行善助童
身兼香港保護兒童會籌委會主席嘅Jacqueline周瑋瑩同父母前晚一齊出席慈善藝術展，雖然Jacqueline要照顧家庭，但對慈善仍不遺餘力，好努力為團體籌集善款，佢話：「自己好鍾意印象派畫，而張太（張朱秋慧）有好多收藏品，令人眼界大開。」對於今次藝術展全數收益將撥捐到香港保護兒童會，Jacqueline非常感激：「今次藝術展主題同我哋團體宗旨好相近，就係愛惜生命、保護地球同為下一代創造更美好成長環境，今次一傾就傾得成，係一拍即合，而自己下年四月先任滿（主席）。」
左起：周瑋瑩、陳丹青、張朱秋慧同金宗岳在藝術展合照。
名媛畫家Cecilia張朱秋慧聯同著名攝影師陳丹青及金宗岳展出近八十幅畫作，以「惜生讚頌」為主題。而向來作風低調的Cecilia，透露自己畫咗六幅畫參展，畫風以最擅長嘅印象派風格同風景畫為主。
Cecilia話同兩位攝影師有共同嗜好，喜愛到大自然地方旅行，佢話：「之前去過北極、南極同非洲，自己鍾意去旅行同親近大自然，加上我哋三位都係TNC（大自然保護協會）成員，協會會安排我哋去大自然嘅地方。」仲想去邊度影相？佢話仲未諗到，啱啱去完新西蘭，覺得好靚。
