李偲嫣（中）撐場慘食檸檬。
撐警大聯盟召集人李偲嫣今個月初喺中環舉辦嘉年華會時，中途換上水手校服扮學生妹演街頭劇，造型令人噴飯。大聯盟尋日又出動去灣仔警察總部撐警，大家都期待偲嫣會再玩啲乜嘢花招，點知佢只係着休閒服飾出騷，完全冇驚喜，仲食咗警方嘅檸檬添！
偲嫣一行人帶住精心準備嘅三份禮物去撐警，分別係對聯、六樽鈣片同二十斤薑。對聯大意係支持警隊無懼政治打壓，堅持執法，鈣片就用綁上藍絲帶嘅果籃裝住，希望為警員補充鈣質，等佢哋骨頭硬淨啲。至於薑就寓意警方「夠薑」執法，同埋為香港驅寒解毒。可惜警方不解伊人風情，唔肯接收鈣片同二十斤薑，只係收咗對聯同打氣信。其實偲嫣成日咁辛苦出動做騷，食吓鈣片補吓腳骨都幾好吖！
第一手消息請下載on.cc東網
