政壇：孫少文改裝商廈分享藝術
樓價高企不下，有物業收租不知幾和味。不過仁濟醫院總理孫蔡吐媚同丈夫孫少文就講心唔講金，近日將家族位於觀塘商廈內一個逾萬呎單位變身美術館，旨在分享賞畫樂。尋日由孫少文基金會資助嘅新美術館舉行開幕禮，並展出首個中國畫展，吸引城中愛畫人士齊去捧場。
孫少文（左二）、太太孫蔡吐媚（左一）同囡囡孫燕華（右二）、孫燕羚（右一）齊現身。
張永霖（右）同太太來賞畫。
現場展出多位知名大師嘅珍品，包括齊白石、徐悲鴻、張大千，林風眠及饒宗頤嘅大作。明德學院校務委員會主席Linus張永霖夫婦一早到場，Linus一眼掃到館內有幅林風眠畫作，即快行上前睇真啲，仲睇到好入神。Linus淡出商界後醉心收藏，經常出席大小拍賣會尋寶。講起買畫，佢自有一套，就係唔睇畫家名氣，亦唔考慮升值潛力，最緊要係睇幅畫嘅韻味，而佢最愛係深沉畫作。
孫少文大女Chloe孫燕華同次女孫燕羚都有到場，身兼基金會主席嘅Chloe話嚟緊仲會搞更多展覽及講座，希望市民有更多機會接觸藝術。
