政壇：泛民「僭建」委會作繭自縛

尋日內委會通過成立「跟進香港國際機場三跑道系統相關事宜小組委員會」，內委會主席梁君彥就預計，三跑小組委員會要等現有同樣研究政策嘅小組委員會完成工作先可展開工作。

議員梁國雄就質疑，到時政府「簽咗約、買晒嘢」就講咩都冇用。而議員李卓人亦都擔心，到時小組未完成報告，三跑已開始興建就覆水難收，要求政府承諾要得到立法會同意先可開工，亦有議員催逼，問小組委員會可唔可以盡快展開工作。

動輒拉布 秘書處缺人手

但立法會秘書長陳維安就話秘書處人手有限，依家唔計法案委員會，已經有十個有關政策事宜嘅小組委員會喇，秘書處亦只能夠應付到十個，唔計三跑小組委員會都仲有三個小組委員喺輪候名單上，要其他小組委員會快啲完成工作，三跑小組委員會先可開始工作。

老實講，泛民近年動輒要求以特權法或以請呈方式開設小組委員會同專責委員會，甚至進行拉布亦令秘書處人手緊張。睇番立會資料，依家立會十八個事務委員會中有十一個都「僭建」嘅小組委員會，其中衞生、食物安全及環境衞生、人力事務同福利四個事務委員會轄下均有兩個小組委員會。以食安及環境衞生事務委員會為例，轄下就分別有討論小販政策同公眾街市兩個小組委員會，如果呢兩項同食物安全、環境衞生問題有最大關係嘅事項都抽出嚟，事務委員會仲有幾多事務範疇可以傾呢？不如摺埋好過啦。