星洲樣樣領先 香港步步沉淪
「這是最好的時代，也是最壞的時代」，英國大文豪狄更斯《雙城記》呢句名言，用來形容新加坡同香港「現代雙城記」，可以講係貼切不過，前者愈來愈好，節節領先，後者愈來愈差，遠遠落後，形成強烈對比。
嗱，香港又輸多一樣嘢喇。國際組織進行嘅調查顯示，全球七十六個國家及地區十五歲中學生嘅數學同科學成績，新加坡高踞榜首，香港屈居次席。係人都知，數學係進入科學世界嘅門匙，而基礎教育更加係培養人才嘅關鍵，新加坡創新科技發展遠遠超過香港，唔係冇原因。
見微知著，呢項調查只係一個縮影咋，星洲幾乎樣樣領先香港，又點止中學生成績，連大學排名都超過香港喇。至於最令人關注嘅競爭力，新加坡更加係後來居上，愈拋愈遠。根據世界經濟論壇嘅報告，香港整體競爭力排名落後新加坡兩位，而貨品價格競爭力更排於全球倒數十五位。曾幾何時，香港被譽為「購物天堂」，以價廉物美見稱，可惜時移勢易，隨着樓價租金瘋狂飆升，營商成本不斷提高，本港貨品售價幾乎冠絕全球。以奢侈品為例，香港貴南韓、日本等鄰近地區兩成至四成，比原產地歐洲地區貴五成，唔怪得旅客望而卻步喇。
除咗整體競爭力遠遠落後，香港喺吸引人才方面更輸畀新加坡九條街。新加坡打開大門輸入人才，外來人口佔總勞動人口近三成，反觀本港話就話有多項措施吸引人才，可惜收效甚微，面對科技人才匱乏，港府一籌莫展，連成立創新及科技局嘅大計亦因為立法會阻撓而束手無策，想唔畀人拋離都幾難喇。
講起真係失禮，香港同新加坡都係亞洲四小龍之一，以前兩地嘅經濟水平不相伯仲，依家新加坡人均GDP已比香港高出四成，簡直不可相提並論。唔怪得新加坡已經唔再將香港視為競爭對手，轉而同歐美日本一比高下。
其實，莫講話新加坡不屑同香港比較，內地城市亦紛紛從後趕上，香港不進則退，優勢所餘無幾，遲早淪為中國二、三流城市嘅咋。難為有啲香港人仲孤芳自賞，自高自大，成日鼓吹「本土化」，簡直係井底之蛙，不知所謂。
正如有人話齋，一個地方嘅興衰有迹可尋，香港之所以不斷沉淪，講到底係自己一手造成，與人無尤，叮！
