城中鏡：上影影：李嘉欣善心撐尼國賑災
連續經歷兩次大地震同多次餘震，尼泊爾災情非常嚴重，而國際人道救援組織Live to Love基金會暨亞洲區會長龐卓貽聯同利子厚，日前就喺香港舉辦咗一場募款餐會，仲特登邀請咗救援組織創辦人嘉旺竹巴法王出席，其他與會者仲有基金會嘅朋友同贊助者，包括李嘉欣、李樂詩夫婦、港大醫學院院長梁卓偉、李天澤醫生、劉懿翎，仲有方敏生同當地震時正喺尼泊爾嘅女兒張燕詩。喺善心者嘅支持下，餐會共籌得三百萬元嘅救援資金。
李嘉欣（左）到場支持利子厚（中）及嘉旺竹巴法王（右）嘅慈善餐會。
親歷前一次大地震嘅張燕詩（右）同媽咪方敏生聯袂赴會。
李嘉欣非常支持呢次活動，仲呼籲大家慷慨解囊，幫助尼泊爾嘅賑災行動，佢自身亦為Live to Love團隊能夠從零開始，承諾肩負起偉大嘅救援工作而深受感動。Live to Love嘅全球親善大使楊紫瓊亦呼籲大家捐助呢個組織嘅救援行動。
嘉旺竹巴法王希望透過今次活動能夠激起港人嘅善心，多多幫助尼泊爾嘅災民。由於雨季來臨，偏遠山區嘅情況尤為嚴峻，而救援組織嘅當前急務係為災民增建避難所，讓災民有瓦遮頭，同時希望關注到全球暖化同環境保護等相關問題。
