特首普選方案討論進入關鍵時刻，主責政改嘅政務司司長林鄭月娥搞到心力交瘁現身醫院？我哋尋日早上發現，身為政改三人組組長嘅林鄭現身瑪麗醫院Ｊ座私家診所，現場所見林鄭精神不俗，亦唔見有親友陪同左右。據了解，林鄭到瑪麗係進行心臟科檢查，有關檢查大約需時一至兩小時。

林鄭月娥尋日早上現身瑪麗醫院進行心臟科檢查，惹來心力交瘁嘅揣測。

林鄭月娥

政務司司長辦公室發言人接受查詢時證實，林鄭曾到瑪麗作定期檢查，但除此以外並無進一步披露詳情。事實上，林鄭嘅身體狀況一向唔錯，甚少向外界提及自己身體有不適，但自從佢一二年中出任司長後，因工作繁重，休息時間減少，林鄭較以往清減不少，曾一度暴瘦十五磅。

政改方案今年四月下旬出爐後，政府總動員推銷政改，林鄭等問責官員頻頻落區派單張，好似前晚佢又出動，聯同公務員事務局局長鄧國威重返一度被批落區「堅離地」嘅堅尼地城，惟至今仍未見泛民主派有意華麗轉身支持政改方案，莫非林鄭都感到力不從心、心力交瘁？

第一手消息請下載on.cc東網iPhone/iPad/Android/Windows Phone Apps