政壇：帽后顏寶鈴唱好孟加拉
飛達控股孟加拉設廠，雖然試過一日停電二十幾次，但已經過咗「痛苦期」，當地工人勤力成本低，人稱「帽后」嘅飛達董事總經理顏寶鈴都話孟加拉係公司嘅「Perfect Match」。但一講到有冇打算叫兩個仔接手生意，帽后立即變番阿媽：「讀咁多書叫佢哋去孟加拉？」收到，阿媽唔捨得。帽后兩個仔，大仔依家搞緊IT生意，細仔就搞基金。帽后話雖然諗過吓退休，但唔會勉強兩個仔接手生意。
雖然顏寶鈴諗過吓退休，但唔會勉強兩個仔接手生意。（資料圖片）
雖然唔想阿仔去，但帽后就猛讚孟加拉係個好地方投資做生意，仲話孟加拉可以搵佢做代言人。飛達今年底目標拓展當地廠房產能至每月二百二十萬件，依家佢哋當地有大概三千個工人，年底前可能會請多五百至八百人。
雖然孟加拉營運成本平過內地多多聲，但帽后仍會Keep住內地一千至一千五百名員工，始終孟加拉配套設施仲係欠咗啲啲。
順口問句孟加拉有乜好玩？帽后即刻耍手擰頭叫記者「唔好去」。明白明白，帽后唱好孟加拉，唔係講玩。
