政壇：街市洗太平地 誤傳高官落區
呢排高官頻頻「打游擊」落區宣傳政改，搞到地區人士入晒腦，杯弓蛇影。話說尋日網上有傳高官會到石硤尾南山邨街市派發政改宣傳單張，由於早前特首都有去過街市接觸市民，令唔少傳媒同示威者都大為緊張，點知最後發現原來係流料。原來高官落區消息源自南山邨街市商販，以訛傳訛搞出個誤會。
南山邨街市商販尋日洗太平地，結果誤傳高官落區宣傳政改。
網上消息話，有房屋署職員通知南山街市商販，叫佢哋收拾好走廊物品同洗太平地，仲話會有官員喺尋日上午九時至下午五時落去巡視添！一大班傳媒收到消息之後蜂擁而至，更加有示威者帶埋標語在場守候。但問過街市商販，佢哋話高官落區消息只係以訛傳訛，大家都唔係咁清楚，但個個都乖乖認真洗太平地。
民協副主席譚國僑話今次其實係個美麗誤會，佢話房署一早叫街市檔販執嘢，係因為今日有其他部門去街市睇衞生同審核檔位使用情況，點知市民就因為咁傳吓傳吓話有高官落區。佢仲話尋日問過房署同警民關係科，都無人就落區作出回應，即係流料啦！
