政壇：建制派封嘴抗拉布
立法會激進派議員包括陳偉業在內嘅「拉布三子」，連續三年就財政預算案「拉布」，已經成為議會常態。立法會主席曾鈺成早前出招，為預算案各個總目編配辯論時間，變相剪布。話雖如此，建制派依然採取「積極不干預」態度，如非必要都唔會要求發言。據悉，建制派個個封晒嘴，係因為擔心發言會令辯論時間拉長咗，主席就會安排多啲時間畀議員辯論，等同助長「拉布」，影響議員明年立法會選舉落區拉票活動。
正如尋日辯論預算案時，狂批拉布嘥公帑嘅工聯會議員王國興就冇出過聲嘞！不過，如果完全唔發言豈不是等同畀泛民同「拉布」嘅激進派玩晒？因此建制派就協調每個辯論範疇只會派政黨代表發言一次，如果多建制派發言嘅話，就盡量唔好個個講晒十五分鐘發言時間上限。但為免畀泛民撳住嚟打，必要時佢哋都會發言澄清甚至反擊。
有建制派議員透露，原來佢哋唔發言其中一個原因，都係為咗喺明年選舉年時可以盡快拉完布，畀佢哋多啲落區見市民拉票，認真有「遠見」。
高官輪更罰坐有貓紙
唔止建制派有對策，其實政府亦都當咗「拉布」係常態，有晒應對方案，除咗問責高官實施「輪更制」，輪流去立法會「罰坐」聽取議員發言外，當局亦已準備咗成本書咁厚嘅「貓紙」，等任何一位官員「當值」時都可以回應到唔同開支分目嘅問題，唔使畀議員問到口啞啞。但佢哋亦都知「拉布」議員發言好多都係純粹發洩，所以如非必要班官員都唔會回應。
另外，有政府官員就透露，由於今年對財政預算案修正案，已被曾鈺成「剪」剩六百幾項，預料會快過去年通過預算案咁話。
