女性地位本無事 庸官一鑊厚多士
世上本無事，庸人自擾之。人稱「每周一鑊」嘅平機會主席周一嶽又有新搞作嘞，繼「族內歧視」及「保障事實婚姻」搞到滿城風雨後，今次輪到幫萬千女性出頭，話傳媒刻畫嘅兩性形象，令女性長期飽受壓力喎，呢啲咪叫做賴得就賴、屈得就屈囉。
係咁嘅，平機會去年贊助關注團體檢視二十多年來本港傳媒有關女性嘅資訊，結果令人嘆為觀止。報告話喎，傳媒對兩性嘅定型帶來負面影響，社會普遍期望婦女照顧家庭，令在職女性感到壓力；傳媒以性別劃分專業工作嘅情況明顯，例如女性多擔任秘書及護士等角色，搞到女性喺企業擔任要職嘅比例偏低；仲有呀，娛樂雜誌有三成頁數刊登女性纖體廣告，導致女性自我價值低落，增加患厭食症嘅風險；而「o靚模」、「港女」等稱呼亦影響女性自我形象喎。
喺平機會眼中，傳媒唔止貶低女性，直情十惡不赦添，但事實係咪咁呢？先講所謂嘅兩性定型吖，冇錯，男主外、女主內一直係中國人嘅傳統，但隨着時代轉變，女性喺職場早就擔起半邊天，唔信嘅，睇吓政府入面嘅女高官不在少數，咪一清二楚囉。再講吖，女性懷胎十月係天賦本能，男性永遠無法體會，唔通男性又走去投訴唔公平咩？
講到纖體廣告咯喎，幫襯與否係消費者嘅選擇，傳媒只係負責提供資訊，只要廣告冇觸犯條例，何罪之有？平機會咁都要管，同製造白色恐怖有乜分別呀？至於話「港女」等稱呼影響女性形象，更加係冤哉枉也，正如專家話齋，呢啲字眼非常中性，戴有色眼鏡嘅只係平機會自己咋。
講真，香港女性地位之高，可以話係世界公認，平機會係都要「厚多士」，到底有乜居心呢？聽住嘞，平機會話喎，負責監管傳媒嘅電影報刊及物品管理辦事處角色被動，稍後要同該處合作推動傳媒自我監管，同埋喺業界守則加入避免性別定型嘅條文，擺明打壓新聞及創作自由喇。立法會議員就講得啱嘞，平機會並無權限同政府部門一齊執法，咁做即係變相打壓傳媒，唔止越權，直情極唔合理添。
其實，來說是非者，就係是非人。周一嶽其身不正，經常被傳媒踢爆，有人懷恨在心又有乜出奇。黃台之瓜，何堪再摘，香港已經夠晒亂，平機會仲要無風起浪，煽風點火，慌香港唔死咩，叮！
