喺新竇葡萄園歎世界嘅貪曾，一邊呷着紅酒溝茅台，一邊回味自己嘅貪腐人生，好不寫意。初夏微風吹拂，貪曾徐徐入睡，夢中竟有奇遇。

「來來來，你們來我的葡萄園做工，一日有一錢，來吧！」貪曾聞得有錢收，即欲撲前，霎時醒起：「咦？這不是福音故事麼？」憶起故事種種，貪曾硬把信者得救、不論前後嘅寓意扭曲，口中喃喃道：「朝早去打工收一錢，晏晝去又係一錢，連黃昏去都係收一錢，我睬你都傻，梗係瞓陣先啦！」

貪曾呼呼大睡期間，葡萄園內工人辛勤工作，雖然僱用有前後，但工人都落力完成工作，收工支薪。夜幕低垂，貪曾伸伸懶腰終終醒來，眼見葡萄園空無一人，竟亂嗌一餐：「喂！話明不分先後，拿拿聲出糧畀我！」叫喊一輪，遠處終有動靜，唔耐煩嘅貪曾爆晒粗咁話：「速速磅水啦！」豈知來者並非葡萄園主人，而是被貪曾驚醒嘅山中餓虎，唉，貪曾！連發夢都要畀老虎叼，人衰真係無得救！

第一手消息請下載on.cc東網iPhone/iPad/Android/Windows Phone Apps