城中鏡：夏千福遊天后廟打卡爆粗？

喺近期避談政改、只係間中喺社交網站「打卡」嘅美國駐港總領事夏千福，尋日再上載到訪大廟灣天后廟嘅相片，仲忽然「入鄉隨俗」疑似爆粗，話「有好『很』多人跟隨這個傳統去拜天后」。由於「很」字乃粗口諧音，發貼冇耐，已經吸引唔少網民留言，恥笑佢「曳曳講粗口」。

夏千福遊天后廟後，留言話好「很」多人拜天后，然後再作修改，惹來爆粗疑雲。（互聯網圖片）

（互聯網圖片）

夏千福尋日朝早留言，話「很高興昨天（即前天）到大廟灣天后廟慶祝天后誕。在場的信眾讓我們看見香港仍然有好『很』多人跟隨這個傳統去拜天后」，佢忽然疑似爆粗，梗係有唔少網民留言恥笑；亦有網民質疑佢西裝骨骨出席漁民傳統活動，「着到咁『四正』去？」覺得同天后誕場合格格不入囉！

美國駐港總領事館約三小時後先知衰，至中午終於「過濾」粗口諧音，將貼文改為「很多人」，但就連網民質疑佢爆粗嘅留言都一併「被消失」，認真小器。但夏千福向來只以英文留言，呢次疑似爆粗，相信係領事館翻譯人員出錯啫。