城中鏡：甄韋喬拍傑青特輯 勉在囚者發奮
十大傑出青年選舉已接受提名，唔少歷屆傑青都趁日前國際青年商會香港總會（JCI）六十五周年晚會，分享過去嘅工作。有「清潔王子」外號嘅傑出青年協會主席Mickey甄韋喬話，唔經唔覺已選咗三百九十二名傑青，當中乜嘢人都有，部分更係更生人士，證明無論乜嘢背景，只要發奮向上，都可以成為傑青。
甄韋喬話傑青乜嘢背景嘅人都有，證明只要發奮就可成為傑青。
李秀恒話依家嘅後生仔經常將問題推畀政府。
傑青趙傑文（左）同張寶雯都有出席晚宴捧場。
Mickey話下月會考察監獄，希望讓會員了解吓監獄嘅環境，佢仲透露計劃製作傑青特輯，希望可以激勵在囚人士。講開呢個話題，佢就話依家少咗請更生人士，原因係佢哋多咗好多選擇，而且工作待遇亦比以前好，但作為僱主，請人就難咗好多。不過，佢讚揚唔少更生人士都好勤力，其中懲教處嘅更生計劃更加係功不可沒。
李秀恒：後生仔唔認同要捱
中華廠商聯合會會長李秀恒早喺九一年就當選十大傑青，現時擔任JCI嘅顧問。講到二十幾年前嘅傑青同依家嘅傑青有乜分別，佢覺得依家嘅傑青認受性差咗，以前好多得獎者都係捱出頭來，但依家嘅後生仔就唔認同呢個觀念，覺得捱係自己攞嚟。上一代人會講讀唔成書、甚至買唔到樓係自己嘅責任，反觀今日好多人就將呢啲問題推畀政府。
擔任咗JCI嘅顧問差唔多六年嘅和富社會企業會長李宗德話平時經常接觸年輕人，有時聽到佢哋嘅意見都好開心。不過，唔知係咪因為科技進步，網上社交媒體發達，令到年輕人對文化價值嘅睇法改變咗。
