政壇：搞搞政：質疑議助協會 象哥挑戰老婆
立法會議員酬金及工作開支償還款額小組委員會尋日開會，討論議員辦事處職員人手同酬金問題。當提到議員工作人員協會今年三月提交嘅建議書，進出口界議員「象哥」黃定光即刻問協會嘅組成：「啲議員職員流失率咁高，會唔會噏完就走晒？個協會應該有名單，係咩人呢？我喺立法會見好多人，拉大旗、作虎皮。」佢仲話自己三個議員助理都唔係呢個協會嘅成員，質疑呢個協會係「一人協會」定「二人協會」？
（設計圖片及對白）
象哥講到旗下助理做咗差唔多十一年時就好自豪，講到興起仲唔覺意大爆助理嘅人工，話佢哋當年入職月薪八千元，依家就加到二萬二千元，覺得議員開支津貼已經足夠，「問題係你點使啫」。不過，象哥肯定唔知呢個協會其實係佢老婆林淑儀做會長嘅工聯會文職及專業人員總會轄下嘅工會，佢哋嘅勞工界議員郭偉強更係當年搞手之一。
「工聯姑爺」被寸唔識規例
對於象哥嘅質疑，郭偉強第一個反應係「咁有趣？」佢仲自爆曾以月薪幾千元受聘於同屬工聯會嘅立法會議員陳婉嫻辦事處，故此深明「議助呢行都好艱難」，認為協會爭取亦有其道理。更有工聯會中人寸爆象哥唔識規例︰「工會註冊要七個人，唔會係一、兩個囉！」象哥呢個「工聯姑爺」竟然咁講，唔知返屋企會唔會被老婆扭耳仔呢？
另外，小組委員會尋日亦討論有關立法會議員酬金及工作開支償還款額檢討報告擬稿，報告指有議員建議提升財務委員會主席同其他議員薪金。但立法會秘書話由於支持建議分別只有十幾位議員，未佔整體議員大多數，故有關建議將唔會納入正式報告當中，而報告將喺本周五提交內務委員會討論。
