雖然泛民主派話企硬否決全國人大常委會「八三一」框架下嘅政改方案，但為咗爭取民意支持政改方案獲立法會通過，呢排建制派紛紛出動撐政改，好多政府高層官員亦先後到街站簽名支持政改方案，而尋日輪到廣東社團總會出動，到尖沙咀碼頭擺街站，收集市民簽名支持政改。

霍震宇

現場仲見到已故全國政協副主席霍英東嘅仔霍震宇，佢話香港經濟要發展，政治就一定要進一步，所以政改過到對香港會好啲。被問到會否擔心立法會「拉布」阻撓政改方案表決，霍震宇就話︰「拉布？咪好似細路仔出牙仔咁囉，出吓痛吓，出吓痛吓，一定會經呢個過程，但最終一定都會成功。」似乎佢對通過政改都幾樂觀喎！

第一手消息請下載on.cc東網iPhone/iPad/Android/Windows Phone Apps