（設計圖片及對白）
白鴿黨嘅立法會「超級區議會」界別議員「AV仁」何俊仁，今年初擅自走出嚟開記者會，宣布將會喺立法會否決政改之後，發動辭職變相公投，雖然呢個建議喺黨內有唔少反對聲音，但AV仁仍然信誓旦旦話點都會搞落去。不過，政治真係一日都嫌長，政客講嘢無句真，事隔四個月，尋日佢終於喺電台上面承認，辭職公投最終成事機會比之前低好多。我地聽聞AV仁聽日會正式宣布辭職公投壽終正寢，認真嘥氣。
當日AV仁自把自為宣布搞辭職變相公投，黨內黨外都引起唔少爭議，先係外界質疑佢點解要揀立法會否決咗政改方案先辭職，既成事實，辭職都冇用，跟住佢就改口，話可以考慮否決方案前成事，而眼見黨內嘅激進派乳鴿支持想成事，但係班溫和派老鴿就想喺會員大會否決AV仁辭職，內訌浮晒面。
學民掟20萬 退聯「燒後欄」
不過，當時學民思潮同學聯力撐公投，泛民都覺得有學界支持下，公投有機會搞得成，所以都無提出反對，任由佔領行動衍生出來嘅「五方平台」處理。點知「雙學」最近相繼反口，學民突然抽身話唔參與，只係話畀二十萬元「掟煲費」了事，而學聯就因為各大學退聯一事「火燒後欄」，無暇兼顧。
其實，雙學話要退出公投之後，泛民議員都私下一齊討論公投可行性，大部分人都覺得雙學退出，令公投失去學界支持，大大減低公投嘅認受性。既然大家都意興闌珊，泛民亦都無意玩落去，聽聞AV仁亦都決定喺聽日宣布擱置辭職公投，等多一日，睇吓係咪又反口？其實大家都估到學民反口，但估唔到AV仁竟然咁天真相信學民仔會同你講金又講心，今次錯信學生真係攞嚟衰。
第一手消息請下載on.cc東網
