整合熟食市場 切勿講完就算

呢，審計署早排發表報告，指截至舊年年底，食環署轄下十一個熟食小販市場，平均空置率達六成一，空置超過十年嘅接近八成，其中五個檔位最長空置年期達二十九年，都咪話唔誇張。香港人多地少，寸土尺金，港府竟然坐視大量土地資源被浪費，你話係咪敗家吖。喺尋日立法會帳目委員會上，高局長被多位議員質詢點解決呢個問題時，強調政府已經凍結發新小販牌，空置率高係自然現象喎。佢又話大部分經營者係草根階層，當局盡量唔想迫遷，將來會加強整合以及將空置率高嘅熟食市場改變用途咁話。

高官講就好聽嘞，又要善用土地資源，又唔想影響攤販生計，實際上根本唔係嗰回事，無非都係推卸責任、「呃細路」嘅藉口啫。好似全港面積最大嘅長沙灣熟食市場咁吖，空置率長期超過一半，食環署○一年聲稱會將地皮交回政府，點知到依家都未有下文。港府家陣又提出「加強整合」同「改變用途」，睇怕都係講完就算嘞。

話時話，食環署轄下市場長期養蚊，早就備受詬病。審計署○三年已經揭發問題，並提出多項改善建議，弊在官老爺意見接受，態度照舊，問題如故，就算審計署○八年再炮轟多一次，署方照樣闊佬懶理，街市空置情況冇改善不特止，仲不斷惡化，身為大地主冇錢收，反而搞到公帑流血不止，簡直混帳透頂。

更令人無法接受嘅係，港府呢頭呻搵唔到地建屋，嗰頭任得大量街市同熟食市場丟空，寧願養蚊種草都唔收回，所謂改變用途完全係大隻講。港府授人以柄，又點怪得拓土建屋大計阻力重重吖。

點講都好喇，今時唔同往日，設備簡陋、衞生惡劣嘅熟食市場已經不合時宜，與其長期丟空，倒不如物盡其用，建屋安民好過。家陣社會矛盾空前激烈，市民早就媽媽聲，有「民望高」綽號嘅高局長如果淨係「講完」就算，遲早變「民怨高」嘅咋，叮！