城中鏡：蔡伯勵大登科 獲頒中大榮譽院士

朋友多要排隊祝賀

廣東「真步堂」天文曆算第三代傳人蔡伯勵今次係首次獲頒榮譽院士，佢笑言尋日係佢「大登科，金榜題名」嘅好日子。事實上唔單止佢嘅通勝受歡迎，連帶佢每次出場都有一大班人圍住，尋日佢到賀嘅朋友就多到要排隊咁滯，逐個影相足足影成四十五分鐘先影得晒。

已多次獲其他院校頒發榮譽院士嘅李維達，獲一大班親朋好友捧場支持。李維達喺醫院嘅工作咁忙，點樣分配時間畀家人呢？佢就笑言，太太即港大醫學院助理院長Ava鄺靄慧仲忙過佢多多聲，所以幾時放假都係太太話事喎。至於Ava則冇諗過加入養和工作，話二人平日已經日見夜見，返工最好都係留番啲私人時間畀大家。

潮州商會會董Lisa劉文文同細佬劉文東都在場，原來因為劉佐德係Lisa堂哥，而佢哋兩家人一直係鄰居，所以堂哥可以話係自細睇住佢長大，而且大家對栽種植物都咁有興趣添！至於劉佐德當年白手創業，過去五十年對本地及內地教育特別着緊，於國內多地成立學校，又捐助本地大學每年邀請國際知名學者到訪演講等。