政壇：搞搞政：李慧琼唔識撈 做「班長」有難度

建制派負責對內聯絡大小政團、協調日常議會運作嘅「建制派班長」一職，過去多年一直係建仔葉國謙把持，而為免班建制派議員喺緊張時刻投錯票，佢好多時都擔任指揮員角色，例如要大家投贊成票，佢就會拇指向上，相反則向下。過去幾年，佢都好享受做班長，十足十係「揸住雞毛當令箭」，好多建制派新丁議員都聽佢支笛，曝光率又高。

但隨住李慧琼出任建仔主席，按不成文規矩需要辭去行政會議成員一職，而政圈就盛傳葉國謙會頂替李慧琼入行會，所以建制派覺得佢再做班長似乎唔係咁適合。其實話佢入行會嘅原因只係導火線，歸根究柢係佢做班長唔稱職，甩甩漏漏。遠嘅唔講，最「大罪」係舊年無做好協調工作，以致工務及人事編制兩個小組委員會「失守」，被泛民主派攻陷取得話事權，就工程及開設職位「拉布」已拉足超過半年，真係多得佢唔少。

雖然建制派對葉國謙不滿之聲浮現，但建仔仍然戀棧班長之位，仲想撐唔再係行會成員嘅李慧琼接任班長一職。不過，建制派有人就批評李慧琼做咗黨主席後，都未見佢有廣邀一眾建制派議員食飯，招呼都唔打個，似乎唔係咁識撈囉！

有建制中人話班長呢個位無講過一定係建仔「世襲」，大把資深議員有資格出任，例如內務委員會主席梁君彥或人緣幾好嘅工聯會黃國健，都係可靠人選。睇嚟今次爭拗，可能又要有關方面出手協調，否則建制派內鬥惡化，只會令泛民漁人得利。