政壇：兩舊雲爆宗教衝突
話說立法會民政事務委員會尋日討論四個社區重點項目，其中油尖旺區議會建議將現時佐敦炮台街休憩處改建為多元文化活動中心，供少數族裔舉辦活動之用，點知掀起同屬九龍西選區議員「兩舊雲」，即係建仔阿Ann蔣麗芸同白鴿黨「一舊雲」黃碧雲嘅宗教之爭。
就多元文化活動中心項目，新家園協會同循道衛理楊震社會服務中心都有遞交標書。阿Ann話興建少數族裔中心係好事，但少數族裔本身有唔同宗教信仰，好似回教、佛教同印度教咁，冇理由交畀一間基督教機構（即循道衛理）營運。
一舊雲就質疑評審委員會嘅人係咪都有阿Ann嘅諗法，如果有宗教背景就唔可以為少數族裔服務，係違反多元共融嘅概念同唔公平，做法形同「玩人」之餘，亦有宗教歧視之嫌。阿Ann反駁，指一舊雲嘅講法太有偏見，冇話一個宗教唔可以服務另一宗教，但就再次質疑基督教點樣服務回教同印度教，又斥對方「頭腦混沌到不得了」。
油尖旺區議會地區設施管理委員會主席陳少棠回應話，委員會曾進行不記名投票，評分表以一千二百分為滿分，當中新家園同循道衛理分別獲得九百一十分同八百三十九分。佢又強調揀標時從冇考慮團體有乜宗教背景。其實根據政府提供嘅文件，委員會已揀選咗新家園作為夥伴機構，唔知阿Ann同一舊雲係冇睇清楚文件，定係為拗而拗喇！
阿毛怕起音樂噴泉
另外，公文袋「阿毛」毛孟靜就觀塘區議會擬建海濱音樂噴泉發言時話，佢對羅馬噴泉好敏感同抗拒，因為當年政府計劃拆卸尖沙咀碼頭嘅巴士總站用嚟起羅馬噴泉，嚇到佢成個彈起。佢又話一般噴泉唔畀行埋去，驚人跌落水浸死唔知賴邊個，仲問呢個音樂噴泉係咪可以畀小朋友玩同戲水。
政府就話音樂噴泉有幾部分，包括花式同互動，有啲識得噴高噴低，亦有地方畀小朋友戲水。其實唔少噴泉都有地方畀人戲水，阿毛講到噴泉有地方畀人戲水就會浸死人，似乎太誇張囉！
