輪候公屋等呀等 無殼蝸牛實難忍

唔係誇張o架。港府話就話承諾三年可以上樓，但房署日前公布嘅數字顯示，公屋輪候冊申請再創新高，接近廿八萬宗之多，平均輪候時間由三點二年升至三點三年。表面睇超標情況唔係咁嚴重，但唔好忘記，呢個只係平均數，實際上好多單身人士，閒閒哋輪候超過十年、廿年都未定。喂，做戲都有講喇︰人生有幾多個十年吖，等等吓，又等等吓，容乜易黑頭人變白頭人o架。

即係咁，輪得公屋嘅都係基層市民，由得佢哋望樓興嘆始終唔係辦法，房委會點都要諗計拆掂佢。房委會資助房屋小組委員會主席黃遠輝日前話，一三至一四年度新建成加回收嘅公屋單位，只有約兩萬五千個，拖長咗輪候時間，預計未來五年都唔會有改善。不過唔緊要，佢又派定心丸，話五年後公屋單位供應總量將會回升至四萬個，到時就可以恢復三年上樓嘅承諾目標喎。

咁即係點？即係大家只要耐心等候，五年之後或者有希望咁解囉。講完一大輪，原來又係叫大家「稍安毋躁」，你話係咪吹脹吖！

講真，即使每年推出四萬個公屋單位，相對於近三十萬宗申請，始終都係杯水車薪。係人都知，港府冇嘢叻，最叻吹牛皮，淨係講高鐵撥款，當年港府實牙實齒話唔使加碼，甚至白紙黑字立此存照添，結果係點，大家有目共睹。房屋問題都係咁，港府早排係威係勢，訂下十年興建四十七萬個公私營房屋單位嘅目標，其中公屋二十萬個，點知首五年淨係得不足八萬個單位落成，換言之第六至十年要跑數，額外起多兩萬幾個至達標，港產官僚識飛都唔掂啦。

最好笑係，港府建屋無能，只能搞埋晒啲數字遊戲呃人。好似「綠置居」計劃咁，話喺公屋同居屋之間，增加一個置業階梯喎；又好似更改計分制，等單身人士可以更快獲分配公屋喎。問題係，公屋單位就係咁多，無論點加快流轉、點更改計分制都好，始終係拆東牆補西牆，無補於事。

所以話啫，乜都係假，增加房屋供應最實際。咪話唔提醒，市民嘅容忍係有限度嘅，冇可能一味等落去o架，叮！