城中鏡：下拍拍：馬僑生為「小巴讓座」解畫
有網民發現有小巴張貼運輸署嘅讓座宣傳告示，呼籲讓座畀有需要人士，惹來熱議，質疑告示「多餘」，因為小巴係不設企位嘅。日前我哋遇到「新小巴大王」Robert馬僑生，對於網民嘅小巴讓座疑惑，佢就笑笑口解釋，其實讓座係一種文化同意識，例如喺小巴上就可以解作讓長者坐近啲方便上落車嘅位置，讓長者上落安全啲之餘，又節省其他乘客唔少時間，更令大家日後潛意識中記得要讓座。
馬僑生話讓座係一種文化同意識，標語貼喺邊都可收潛移默化之效。
Robert話自從小巴實施二元乘車優惠計劃後，的確多咗好多長者乘客，但小巴座位數目唔多，佢哋除咗要繼續努力爭取將十六座位小巴增至二十座外，仲研究緊引入自動趟門嘅新小巴，方便長者上落。但自動門一開一關可能花多啲時間，所以目前率先引入兩部試驗，有成效再增購逾百部。佢話長者多外出，唔使成日喺屋企或留喺邨內買餸，多同老友記聚會，人都健康啲。
