城中鏡：母親節喜抱孫 張心瑜收大禮
做仔女嘅喺每年母親節都會出盡法寶氹媽咪開心，但立法會前議員「蔡菜子」蔡素玉就認為每日都係母親節，佢亦早已送咗張提款卡畀媽咪，等媽咪想買乜都得，所以尋日冇再特別選購禮物，一家人簡簡單單食晚飯已經好滿足。香港南京總會創會會長張心瑜尋日朝就收到孫仔提早出世嘅好消息做最佳禮物，話為人母親近三十年，今年最驚喜難忘。
張心瑜（右）尋日抱孫，係佢近三十年嚟最驚喜難忘嘅母親節禮物。（受訪者提供）
蔡素玉（右）話早已送贈媽咪一張提款卡任撳，每日都係母親節。
許華傑（左起）、囝囝等家人一齊同媽咪（右三）慶祝母親節。（互聯網圖片）
深圳衝返港
話說張心瑜前晚如常到深圳準備打高爾夫球，估唔到尋日清晨一開波，就收到大仔來電，話本來預產期係本月十六日嘅孫仔提早幾日出世同佢慶祝母親節，既然咁開心，佢梗係要即刻衝返香港啦，仲話呢份係佢咁多年嚟最特別嘅母親節禮物。有孫萬事足嘅，仲有香港中華出入口商會副秘書長許華傑媽咪，尋日許華傑帶埋囝囝及妹妹等家人齊齊同媽咪飲茶慶祝，最希望媽咪健康。
唔少人會嫌媽咪長氣，食物及衞生局局長高永文曾經都係其中之一。尋日佢喺母親節步行籌款活動主動分享往事，話媽咪雖已去世多年，但仍緬懷媽咪以前不時同佢講關於家鄉嘅事物，乜嘢都講一餐，有時都覺得好囉唆，但依家就感慨自己年輕時太早工作，做醫生又太忙，經常無暇陪媽咪，到依家想聽都無得聽，感到後悔，希望天下子女唔好再嫌媽咪長氣，珍惜相處時光。
