政壇：搞搞政：議員粗口戰升級博士翻譯睇語境
喺立法會負責翻譯工作二十一年嘅總翻譯主任鍾龍山博士早前退休，卸下議會沉重嘅翻譯工作，大談由立法局年代至現時立法會嘅工作體會。鍾博士話立法局年代嘅議員比較着重立法嘅工作，相反依家啲議員比較着重監察政府，發言都變咗批評政府較多，令到佢哋一日會議要翻譯成二、三萬字，「拉布」亦都令到佢哋工作量大增。言下之意，唔知鍾博士係咪想話啲議員吹水多過做實事呢？
鍾龍山博士
翻譯「收皮」 三種意思
二十一年嘅立法會翻譯工作，鍾博士形容為「集體創作」，因為每次會議翻譯都經過多重審核，以確保正確無誤，遇到重要嘅文件，甚至要經過秘書長審核，但強調政治考慮從來都唔會係做翻譯嘅考慮因素。
不過，佢就慨嘆依家已時移勢易，議員較着重監察政府，相反以前嘅議員，尤其係立法局年代議員，工作較偏重於審議條例，所以佢哋嘅發言亦可作為立法原意參考，有需要時，甚至可作為呈堂證供添！
近年議員批評政府或敵對陣營嘅言論愈來愈激，使用粗口諧音不特止，甚至用到「收皮」等粗俗字眼，如出現以上情況，會唔會令翻譯人員好頭痕呢？
鍾博士就話唔方便評論議員發言，但「收皮」可以視乎唔同情況有唔同譯法，溫和啲嘅意思可以係叫人唔好再講嘢，可譯作「Stop it（停止）」，如果有結束意味就係「That's it（就這樣）」，而粗俗啲意思係叫人去死，英文可譯為「Go to hell（落地獄）」，所以翻譯要睇語境，唔可以一概而論。
鍾博士早於一九九四年就加入當時嘅立法局，出任中文主任一職，經歷立法局、臨時立法會同埋立法會年代。佢講笑話，當年喺香港大學翻譯系畢業後，同學都笑佢明明係英文好過中文，做乜走去做中文主任喎。
佢就解釋「中文主任」只係個職銜，其實都係從事翻譯工作，直到二○○○年後，「中文主任」才易名為「翻譯主任」，呢個誤會先唔再發生。
