政壇：吳得掂 手機傳歌冧媽咪
尋日係母親節，當教育局局長「吳得掂」吳克儉出席十大傑出青年選舉提名時，就被記者追問佢點樣同媽咪慶祝？原來佢早前已經同年過八十歲嘅媽咪去飲茶，提早慶祝母親節嘞，仲教媽咪用智能電話添！
吳克儉
咁喺母親節正日，有乜表示先？佢話今朝就傳咗首歌「世上只有媽媽好」氹媽咪開心。問佢點解唔親自唱畀阿媽聽，佢就話：「Send（傳）咗當唱咗啦！」吓！咁都得？唔係佢唱喎。
對於中大學生會反對解放軍駐港部隊到中大舉行聯誼活動，吳克儉話呢件事涉及院校自主，佢尊重中大嘅決定，而佢認為呢啲聯誼活動，係可以加深雙方了解。被問及解放軍有何需要進入大學與學生交流，佢期望公眾唔好以政治嘅角度嚟看待呢啲聯誼活動，若對活動嘅性質有擔心，可以親自參與同觀察實際情況。
